何韻詩很喜歡小孩，雖然未婚但已想嘗試當母親的滋味，阿詩表示仔和女都沒所謂，但她說：「可惜𠵱家冇對象，冇人肯幫手。」問她何不找和她曾傳緋聞的劉浩龍幫手？阿詩說：「我唔可以𡁻完鬆，唔可以要仔唔要公，況且佢一定唔係我將來嘅結婚對象。」
想為人母擬借種
阿詩又說：「好多外國人都鍾意領養，不過接觸過身邊朋友嘅小孩，同佢哋爹哋媽咪生到成個餅印咁，我都覺得好得意。」阿詩表示若仍找不到對象，她不排除會借種生仔，製造小詩。
那阿詩的擇偶條件又是甚麼？她說：「我嘅擇偶條件幾苛刻吓，我一定要一見鍾情，重要有叮一聲嘅感覺，絕對要頂得順我嘅肉麻同癡纏。我每次拍拖都會插水式咁投入成段感情，我可以為另一半犧牲，但都會理智地唔自殘自己，只要冇影響到生命，我一定為對方赴湯蹈火。」
阿詩透露多年前曾跟一名圈中人拍拖，但她發現自己是第三者時，即時抽身退出，她說：「我係接受唔到三角關係。」阿詩堅持不想影響舊愛，故怎都不肯透露男方身份。
問阿詩失戀後會如何收拾心情？她說：「我會不停搵朋友傾訴，將心裏邊嘅唔開心講完又講。我自己性格都有一個好處，就係成日都好阿Q精神，傷心完一陣就算。」
同劉浩龍冇可能
何韻詩和劉浩龍無論外形和性格上都幾乎是絕配，可是這個當事人卻一直矢口否認戀情。當筆者一提到劉浩龍，阿詩即笑不攏嘴，但她卻解釋說：「最搞笑係fans都對號入座，佢哋都以為我哋係天生一對，大家唔好再一廂情願。」阿詩自爆二○○六年願望，竟是希望劉浩龍早日找到真命女友。
阿詩還自言不介意為劉浩龍做媒，她說：「我諗佢鍾意靚女啩。」阿詩的助手竟口痕說：「咁冇理由鍾意你。」阿詩即時反駁：「佢有話鍾意我咩，我同佢真係絕對冇可能。」