每年年底均是歌手的緊張時刻，因各大音樂頒獎禮舉行在即，同時是非亦滿天飛，有傳容祖兒及楊千嬅因爭最受歡迎女歌手獎而聯手封殺何韻詩，阿詩日前氣定神閒地說：「我計落自己應該排第三位，但我一啲唔介意。」何韻詩說會聽從師傅梅艷芳的遺訓，不要相信「虛火」，且看何韻詩如何將虛火煉成洪爐火。
是非篇：終於有人留意我
何韻詩早年出道時曾傳出跟容祖兒（Joey）過從甚密，阿詩今年走勢不俗，大有機會角逐年底多個樂壇頒獎禮的最受歡迎女歌手，因為競爭激烈，最近卻傳出Joey和楊千嬅聯手封殺阿詩。
問到阿詩可想做今年樂壇頒獎禮的大贏家？她即說：「咁又唔到我自己想唔想，我會以平常心去看待，因為我覺得喺工作中學到嘢，已經係最大得着，我都對自己今年嘅成績好有信心，我今年做咗一百一十巴仙嘅工作，相信收成同付出係成正比，我亦好知自己嘅位置喺邊度。」
「邊個攞獎都開心」
阿詩自問是一個很有自知之明的人，她說：「我好知自己個位喺邊度，暫時唔會去追求啲乜，我望一步一步前進，我唔恨一步登天，阿梅（梅艷芳）曾經喺我出道時忠告我唔好相信虛火，佢話一定要腳踏實地，我唔希望自己一炮而紅，寧願慢慢儲晒啲經驗同技巧先上位。」
至於可有視哪一位女歌手為年終頒獎禮上的假想敵，阿詩說：「Joey同千嬅點計都係天后級人馬，我又唔會視佢哋係假想敵，而且大家路向都唔同，好難做比較，不過我哋成日會互相鼓勵，邊個喺頒獎禮攞獎我都戥佢開心，當然我啲老友攞番就開心好多。」
阿詩相信她與Joey和千嬅的不和傳聞，大家會心照，她說：「其實每年頒獎禮都有好多炒作新聞，乜嘢研究得獎走勢，以前我未入流都冇份畀人講，我得個睇字，但今年有幸加入戰團，我計落自己應該排第三位，我一啲唔介意，因為換句話說即係終於有人留意到我何韻詩，都算係我今年嘅大躍進啦！」
祖兒常致電慰問
阿詩還大讚當年新秀出道後，得到師姐千嬅的關照，她說：「千嬅係我嘅師姐，我當時新秀啱啱出道，佢都好幫我。」
談到圈中的三位好友，阿詩首數陳文媛（BoBo），她說：「佢份人嘅性格係典型嘅處女座，佢好有真我個性，好直吓，係圈中稀有品種，佢經常喜怒形於色。」
第二位圈中好友，阿詩指是近日盛傳不和的Joey，她說：「我同Joey嘅緣份好得意，大家同時期出道，喺一個音樂節目認識，平時雖則唔係成日聯絡，但Joey份人好有心，佢一旦知道我唔開心，嗰段時間就會成日打電話慰問我。」
阿詩因為已故恩師梅艷芳的關係，認識了劉培基，她說：「佢亦師亦友，份人好得意。」
談到阿詩將來的目標，她說：「我會繼續唱多啲歌，喺音樂上發展，不過另一方面又想用自己的知名度去影響歌迷，畀一啲正面訊息佢哋，我會以梅姐做榜樣，做多啲公益事業，回饋社會。」阿詩可是想做梅艷芳的接班人，她說：「梅姐係梅姐，佢永遠冇人可以代替嘅！」
撰文：比華利 攝影：陳慧安
場地：PaparazziClub
髮型：[email protected]
化妝：KrisWong
服裝：ing、att
