以敢言見稱嘅陳日君主教，大家對佢政見立場好清晰，對佢嘅私生活就所知不多，佢接受商台節目《無底深談》主持李慧玲訪問時透露，自己十六歲時隻身嚟香港，並唔係要逃避中共，而係入讀慈幼會初學院準備做神父，初時諗住讀完幾年書就返上海老家，點知政權變色，佢就留喺香港，後來去意大利留學，至八九年先重回內地教書。
陳主教話由於自幼已立志做神父，後生時最積極做教會工作同返教會，對感情事無乜興趣，故此無試過拍拖滋味，對佢嚟講，做神父係自然要行嘅路，咁多年最困難時刻，係教廷委任佢做主教時感到有啲驚，因為佢對教區工作認識唔多，加上年逾六十，擔心教徒唔接受佢，未正式公布時每朝起身都「驚一驚」。
陳主教同曾特首有私交，曾特首個仔結婚時都搵主教做證婚人，陳主教話由於曾特首係虔誠教徒，日日都去教堂，為佢個仔做證婚人係合理嘅事，至於佢幫肥佬黎施洗一事，陳主教話佢其實唔識肥佬黎，只係透過馬丁李柱銘介紹，馬丁話肥佬黎好虔誠，陳主教就派個神父去試吓肥佬黎識唔識天主教道理，肥佬黎過關，主教就為佢施洗，「我信得過李柱銘。」
爆料熱線：29290000、27860099
報料傳真：26239278
報料電郵：[email protected]