王家衛
在大榮公司年代，我已經覺得王家衞好有才華，當時佢做編劇，都捱得好辛苦先有今日嘅成就，我同佢拍片風格好唔同，佢較為着重藝術性，我就偏向商業化，拍戲亦冇佢咁有耐性，但𠵱家佢自己做老闆，拍幾耐係自負盈虧，咁我就覺得冇問題。
劉德華
華仔搞天幕公司時，我同佢先合作拍了一部《九一神鵰俠侶》，呢部戲幫佢公司賺咗錢，後尾又同佢搞咗部《天長地久》，我覺得華仔同人溝通方面比較好，佢畀人嘅感覺好親切同孩子氣。但華仔搞天幕蝕咗咁多錢，我覺得最大問題係佢遇人不淑，佢係好想拍啲好戲出嚟，但各方面未必配合。
周潤發
發哥仔係我遇過咁多演員入面，最好修養嘅一位，當年同佢合作拍《花旗少林》，佢對任何一個工作人員都好親切，佢對人嗰種寬容態度，對我日後拍戲都有好大影響，不過我覺得發仔嘥咗十年時間喺美國拍戲，冇返嚟拍港產片，對香港觀眾係一個損失，而事實上外國導演拍佢，始終未必明白佢嘅特質，唔能夠將佢嘅優點盡量發揮出嚟。
