原島大地母親昨日哭訴愛兒被小長今母女欺凌，在《超班寶寶》一片中與大地有多場對手戲的田蕊妮昨力撐大地乖巧，她在電話中說：「大地係一個好精靈嘅小朋友，佢有時講嘢都寸寸哋，但好孝順媽咪。」
「小朋友玩吓啫」
問田蕊妮可曾目睹大地與小長今有拗撬，她說：「佢哋根本言語不通，都好少一齊玩，但大地好照顧小長今，有時都會拖住姐姐周圍去，不過我都見過小長今有時有糖唔請大地食。」對於大地母親指小長今曾掌摑其子，田蕊妮說：「咁咪日韓大戰？如果打人就唔啱，細路仔個媽咪都要阻止，但我都冇見到呢一幕，其實大地係活潑，但佢一啲都唔百厭。」
在《超》片中飾演小長今父親的林家棟昨在電話中說：「我喺現場又冇問題喎，小朋友玩吓啫。」問他可曾見過兩位小朋友打架？家棟笑說：「我打佢哋就有份，真係唔覺，佢哋拍戲時次次都有媽咪喺側邊睇住，點會有呢啲事？大家又雞同鴨講，基本上唔會發生呢啲問題囉。」
而扮演小長今母親的陳嘉容說：「大地同小長今言語唔通，我喺片場唔覺佢哋有異樣。」問陳嘉容可覺得大地過度活躍？她說：「大地真係超級活躍，雖然玩到好放，但一埋位又入到戲，冇影響大家。」
採訪：比華利