影壇一直流傳一個傳說，指劉鎮偉多年前曾得罪了永盛電影公司老闆向華勝，緣於他向永盛外借星爺拍《新精武門1991》，但後來變成買一開二，又多拍了一部《漫畫威龍》出來，引起向氏不滿，自此，他行蹤變得神神秘秘，以酒店為家，多年來不敢以真名拍戲，化名為技安做編劇，意指忌諱××安。
事件始末，且聽劉鎮偉細說從頭：「我所知向生冇嬲我喎！呢件事我只不過係幫人食死貓，因為當年袁金倫同星仔搵我搞《新精武門1991》，後來係佢哋決定再拍多一部戲，我只係負責去執行，事後我冇聽過話向生有意見，所以傳聞話佢唔畀我拍戲，呢啲係誤傳，我改名技安，只不過想試吓唔用自己牌頭拍一啲新戲種，睇吓觀眾有乜反應啫！」