周星馳經常傳出與拍檔合作時鬧不和，有份量如洪金寶一樣與他鬧翻，只有將他捧成一線影星的鬼才導演劉鎮偉可以鎮得住這個「馬騮星」，原來在拍攝現場，劉導演會變身為觀音心腸的媽媽角色，盡量滿足其要求。
劉鎮偉為周星馳執導的《西遊記第壹佰零壹回之月光寶盒》及《西遊記大結局之仙履奇緣》，曾在內地掀起熱潮，被內地的大學生奉為經典，十年後他再執導第三部曲《情癲大聖》，但主角就由謝霆鋒代替周星馳，不過他與周星馳一直合作無間，以星爺經常與拍檔鬧翻的密度來看，惟獨劉鎮偉例外。
「似阿媽湊住佢」
在訪問中再三追問劉鎮偉何解？他都是支吾以對，再追問他，始哈哈笑說：「你硬係要迫我講話自己聰明嘅，講真同佢都合作咗咁多部戲，由《望夫成龍》、《賭聖》到《西遊記》，將佢一手捧成一線演員，佢對我一直都好尊重，而我同佢合作其實我係扮演緊女角，個角色就好似阿媽喺側邊湊住佢咁，盡量滿足佢嘅要求。但唔代表要就住，我覺得佢有乜問題，一定會講。」
星爺繼《功夫》後，再邀劉鎮偉擔任續集的監製，但他卻推辭了。記得當初《功》片是由洪金寶做武指，後來他與星爺不咬弦，被迫退下火線。身為該片監製的劉鎮偉夾在兩者之間，目睹一切過程，聽他憶述始末：「其實呢件事星仔同大哥（洪金寶）都冇錯，我覺得大哥度嘅動作場面係冇問題，但星仔覺得唔係佢要嘅嘢，咁佢係部戲嘅導演，係一部戲嘅創作之尊，就算我係監製，一樣要尊重佢嘅決定，佢同我講話同大哥夾唔到想換人，我就話如果真係要換就早啲同大哥交代清楚，唔好阻人，咁啱喺呢個時候，大哥又返咗香港醫糖尿病，與此同時哥倫比亞就去請袁和平幫手，成件事其實係哥倫比亞處理得唔好。」
「做人發財立品」
在大隊回港後，劉鎮偉宴請大隊吃慰勞宴，星仔知道後亦提出要來，劉鎮偉表示：「嗰晚佢重爭住要畀錢請客，飯後我就同佢講：『星仔，要繼續保持修養，要發財立品呀！我唔想再聽到你喺片場鬧人喇！』
劉鎮偉續說：「其實佢喺拍《功夫》時，我真係冇見過佢鬧人，哥倫比亞重多謝我，話我喺度可以令到星仔情緒比較穩定，我個人愛才，我先會勸佢，無謂嘛！佢拍嘅喜劇係帶畀入場嘅觀眾歡樂，咁做乜搞到自己同啲工作人員都咁痛苦呢？」
撰文：陳月媚
攝影：何國豪
場地提供：觀塘apmKubrick