民主派成功否決政改方案，煲呔黑口黑面話送唔到聖誕禮物畀香港人，其實鳥籠方案呢份「大禮」，收咗都唔知有冇運行。肥龍許仕仁確係好戲之人，鬧完陳主教同馬丁後，噚日已經變臉，特登去到民建聯喺灣仔搞嘅振興消費活動，算係向保皇黨謝票。
呢種親民活動，由煲呔去唔係重好咩？接近禮賓府消息人士好凝重咁話，崩口人忌崩口碗，金融風暴後，煲呔豪言壯語話聖誕後香港經濟實掂，後來發生乜事大家都知，因此獲得「聖誕權」稱號，聖誕節都係少露面為妙，要佢好似肥龍咁扮聖誕老人，真係強人所難嘞。
蔡菜子再獲寵愛
肥龍八面玲瓏，去到民建聯地頭如魚得水，日前俾煲呔攬實嘅蔡菜子，噚晚再獲高官「寵幸」，肥龍見到佢又係一個箭步上前同佢擁抱，蔡菜子笑到見牙唔見眼，呢份聖誕禮物真係大咯。
灣仔區商戶受世貿影響，喺聖誕前消費旺季見財化水，民建聯轉數快，即刻大鑼大鼓舉行振興消費活動，佢哋話每間舖頭少者唔見五萬銀，多者十萬蚊，都咪話唔傷。灣仔區議會主席黃英琦則話，搞一大輪街頭嘉年華活動可能只係虛火，正所謂旺丁未必旺財，區議會要度橋喺農曆年前再吸引市民到灣仔消費。
噚晚《南華早報》同港台亦喺灣仔舉行籌款活動，搵埋肥龍等一班高官名人成三千幾人一齊扮聖誕老人，成事嘅話隨時破健力士紀錄，肥龍亦好慷慨，捐咗二千蚊出嚟，民建聯譚耀宗就捐咗五百蚊。
廣播處處長朱培慶算係半個主人家，噚晚當然要現身，煲呔競選時已紮行馬要整治港台，呢個冬天港台真係要頂住寒流，春天唔知幾時先到。朱培慶話聖誕願望係希望港台可以同其他傳媒一樣，緊守新聞自由崗位，另一個願望係希望香港公民社會穩步發展。
爆料熱線：29290000、27860099
報料傳真：26239278
報料電郵：[email protected]
