這個聖誕節，黎姿雖然獲各方好友邀請參加派對，不過她選擇了謝絕一切約會，跟父母共享家庭樂。由於黎姿仍未遇上真命天子，故她表示要先裝備自己，學做可愛女人來吸引異性。
黎姿將與父母共度聖誕，早前更與媽媽選購聖誕禮物和聖誕裝飾來布置家居，黎姿日前說：「我買咗棵六呎高嘅聖誕樹，重去百貨公司買咗啲靚波波，同屋企人一齊布置聖誕樹，個感覺好warm，冇嘢比得上家庭溫暖，以前只係覺得畀錢屋企人就得，人大咗就會注重家庭。」
去派對似應酬
黎姿雖然仍未遇上真命天子，但她表示不會為結識異性而出席聖誕派對，還自爆以前的男朋友亦非在派對中認識，她說：「今年有好多朋友請我去party，但我覺得好悶唔想去，平時已經有好多活動要做，聖誕重要扮靚靚去應酬好辛苦，同平時啲function冇分別。男仔唔一定要喺party先識到，如果唔出現，你去一百個party都搵唔到，我以前拍過咁多次拖，都唔係喺party識，而係朋友介紹，可能有事業就冇愛情，咁𠵱家咪專心工作囉！」
學做可愛女人
黎姿相信緣份天注定，現階段雖未找到合適對象，但亦不會強求，她說：「做好自己，運就會嚟，做一個可愛女人，總會有好男人愛錫你；想人愛你，先要值得俾人愛，男人愛你唔係天經地義，一個靚女人係睇內心同性格，而唔係外表。」
採訪：魯萍
攝影：陳偉權
場地：又一城
髮型：Hair@BrianKan
服裝：Gucci
