廖碧兒和鄭嘉穎最近合作拍攝無綫劇集《強劍江湖》，由於聖誕節要一起趕工，兩人都不能跟家人共度佳節。談到聖誕願望，廖碧兒希望明年換大屋，令家人住得舒服；鄭嘉穎則希望可以過一個白色聖誕。
廖碧兒和鄭嘉穎雖同屬一個經理人兼最近一起拍攝無綫劇集《強劍江湖》，但原來二人不太熟絡，因在劇中對手戲不多。日前他們應邀一起拍攝聖誕照，起初顯得有點拘謹，其後愈見熟絡時，才互相取笑對方。
升格做奶奶
廖碧兒在加拿大長大兼讀書，鄭嘉穎則在美國讀大學，故份外重視聖誕節，並有跟家人和朋友交換禮物的習慣，但他們今年要拍攝《強》劇，故不能跟家人共度佳節。廖碧兒日前在中環說：「呢排啲通告好密，就算我有親戚嚟咗香港，都陪唔到佢哋，𠵱家連聖誕禮物都未有時間買，所以希望趁呢兩日有啲空檔時去買。」
廖碧兒家中將多一個新成員，就是愛犬Mac的未來老婆Bailey，故此她要為「未來新抱」添置物品。問廖碧兒有何聖誕願望？她笑說：「希望出年賺多啲錢，可以換過間舒服啲嘅屋，等父母同啲狗可以有個更好嘅居住環境。」
盼白色聖誕
鄭嘉穎則表示早於數星期前已送了聖誕禮物給母親，他說：「呢幾年都陪唔到媽咪過聖誕，所以之前買定禮物畀佢，不過我嗰份佢未送畀我喎。」至於聖誕願望，鄭嘉穎希望明年可度過一個真的白色聖誕，他說：「我唔想出年喺廠過一啲人造嘅白色聖誕，真係好想去外國過一個開心嘅白色聖誕。」
採訪：馮美茵
攝影：林德雄
協力：羅慧敏
服裝提供：VERSACE
首飾提供：EdwardChiu
場地提供：中環IFC
髮型提供：WardenofIIColpo（廖碧兒）
