陳苑淇養了一頭剛毛獵狐犬Pocky，小霸王Pocky經常四處搗蛋，鬧出不少笑話。拍照當日，Pocky一落街已表現得十分興奮，陳苑淇為怕牠咬爛人家的足球，即出動撒手鐧，為Pocky戴上口罩。
樂壇新人陳苑淇的愛犬Pocky是較少見的剛毛獵狐犬，只得兩歲的Pocky仔，可說是家中小霸王，深受陳苑淇父母寵愛，陳苑淇笑說：「爹哋同媽咪都勁錫佢，有次爹哋飲醉酒，就當佢係BB咁抱。Pocky好跟我，成日要跳上我張床同我瞓，但係我皮膚敏感，所以成日都搞到我生粒粒。」
由於Pocky十分活躍無時停，弄出不少笑話，令陳苑淇十分尷尬。拍照當日Pocky一落街已表現興奮，除了周地聞，見到垃圾膠袋牠更雙眼發光。有學生在附近踢足球，Pocky又把玩人家足球，令陳苑淇十分尷尬，她擔心Pocky會整爛足球，只好出動撒手鐧替Pocky戴上口罩，以免Pocky四處搞事。
生腎石要戒口
陳苑淇說：「佢之前偷食咗成包牛肉乾，結果又屙又嘔，睇醫生時重發現佢生腎石，所以近期佢要坐監，唔可以再食其他雜食，一定要依足醫生嘅指示，唔係就手尾長。」
陳苑淇笑言Pocky十分討人歡心，雖然牛精，但卻聽教聽話，訓練Pocky做一些難度動作，牠都會乖乖完成，難怪Pocky成為陳媽媽的寵兒，陳苑淇說：「媽咪一向都會放個暖爐畀Pocky瞓覺用，近排天氣凍，有次我就偷偷將個暖爐放喺我間房，點知第二日就俾阿媽勁鬧，阿媽話Pocky唔識冚被，鬧我想凍死佢喎。」
採訪：駱華齡
攝影：陳偉權
