昨日大家趕住做冬，基本上都冇乜投資意欲，小初大部份時間都係睇多過做，得閒到周圍打電話搵老友吹水，最熱門嘅話題當然係新世界發展（017）批股違規，最終批少咗呢件事。
呢單嘢真係有啲怪，有乜理由嗰頭對沖基金TCI沽咗貨，呢頭新世界就縮減配股規模咁巧合。經紀黃話，家陣人哋理直氣壯，話監管機構唔批啫，睇怕過咗海已經係神仙咯。
另外，經紀黃嘅愛股理文造紙（2314），公布發行10億元可換股債券，昨日復牌股價跌1.74％，收8.45元，成交股數62萬股，金額528萬元。
經紀黃話，理文造紙今次集資，主要係擴大產能，況且批債券在2011年才到期，行使價高達12.04元，就算有攤薄效應都唔會咁快顯現。不過公司發行呢類衍生產品，部份要咗貨嘅基金因為要做對沖，短期內或令股價波動，但中長線而言，基本因素冇變，業績持續增長，所以仍然睇好。
慕容小初