大市繼續有假日氣氛，總成交較前市少46億元。日股早段散198點，埋單只下移16點，勁度十足。未來幾日，港股如果偶然散落去，都會好似日股咁彈番上嚟，有平C輪要買。
和黃C輪9709：和黃（013）不愧係製造特殊盈利高手，期期有數入帳，今回喺年結之前，賣19.3%和電（2332）出去，售價101億元，盈利佔74億元（真係好賺），趕得切入本年度帳目，抵銷部份3G唔多掂嘅影響。和黃收74.60元，升0.40元，似乎未反映呢單交易嘅利好作用，和黃C輪要買。
和黃C輪揀對象，先諗9709，明年4月下旬夠鐘，輪價32.5仙，溢價7.6%，槓桿率23倍（有效10.7倍），引伸波幅22.7%。
想搏殺，搞9085，但隻輪下月17日最後買賣，但正股3個禮拜內升唔夠1.44元，揸隻輪就會變成揸廢紙。
聯想C輪9314：聯想（992）換高層，股價散4%，收3.575元，情況唔多妥。如果再散到上月低位3.30元，博守得住，投機買C輪9314（唔係「九死一生」）。隻輪明年4月上旬到期，輪價60仙，溢價2.1%，槓桿率6倍（有效5.1倍），引伸波幅30.6%，細細注好嘞。
章盛