任賢齊和黃品源聖誕節會在馬來西亞開演唱會，並會表演魔術。因小齊和品源私交甚篤，所以他們希望演唱會可以如譚詠麟和李克勤的「左麟右李演唱會」一樣長做長有。
星期日是普世歡騰的聖誕節，任賢齊和黃品源拍住上搵真銀，在馬來西亞雲頂舉行「聖誕齊源演唱會」，今次二人首次合作開騷，所以心情特別緊張，早前二人更積極在港排舞。黃品源在演唱會中還會表演魔術，希望演唱會像一個百老匯式表演那麼精采。
怕忘舞步
小齊說：「其實以前我哋都係各自開演唱會，跟住互相做對方嘅表演嘉賓，我哋好熟，又見到譚詠麟同李克勤嘅『左麟右李演唱會』咁成功，我哋都可以試吓，希望有唔同嘅表演畀人睇。」
黃品源在排舞當日表現得非常緊張，他解釋說：「因為以往我只係彈結他唱歌，好少跳舞，所以特別緊張，好怕唔記得啲舞步。」小齊和黃品源的演唱會中還會有儀仗隊表演環節，二人在台灣當兵時曾加入儀仗隊，所以今次可謂駕輕就熟，不過他們要拿着十磅重的假槍不停轉動及擺出各種陣式，偶然也會失手撞到對方。
撞瘀手腳
小齊說：「我哋啲手腳撞到瘀晒，不過都冇問題嘅，最緊要好睇嘛。」小齊希望在演唱會中盡量一起在台上表演，有如一個派對般，以迎合聖誕氣氛。
採訪：胡比 攝影：何國豪
