台灣代表趕探監

台灣代表趕探監

噚日冬至,好多人都提早收工過節,但台灣駐港代表鮑正鋼(圖)就好奔波,因為除咗要趕住出席《大陸台商1000大》呢本特刊嘅發布會,負責上台致詞外,重要趕住去探喺世貿期間被捕嘅台胞,事關對方嘅爸爸到咗香港,作為駐港代表,冇理由唔現身協助,所以佢去發布會遲到早退,逗留咗唔夠10分鐘就走人!
講番本書,係「中華徵信所」用咗10個月時間,對國內15000家台商作出多方面評估後,再按業績排出頭1000大。華華計過,呢1000個大陸台商去年做生意嘅總額有成7336億人民幣,都咪話唔犀利。

排頭位嘅係鴻富錦精密工業,佢嘅母公司鴻海集團旗下有16間公司入榜,總營業額逾848億人民幣,係最多收入嘅;而最多子公司入圍嘅頂新(含味全)集團,有成27間子公司入圍。發展得最快嘅行業梗係科技業啦,事關頭10名都係科技公司!