趙飛雲前晚同大行老友入場捉「火雞馬」，結果兩個人唔見咗好多隻聖誕火雞，不過就無損大行老友的心情，因為佢提前放聖誕假，去日本過一個白色聖誕。臨行前叫趙飛雲留意吓沿海家園（1124）、遠東發展（035）及思捷（330）。
外圍雖然無大變動，但港股由於臨近長假，投資者買意消減，而計數離場者較多，所以恒指走勢牛皮偏軟，全日波幅僅82點，最後收15182，跌38點。
技術上，恒指跌穿15200，反映之前只是假突破，但由於跌穿幅度輕微，亦毋須太悲觀，或者今日才真正出現突破亦未定。
雖然趙飛雲並非太悲觀，但昨日滙控C輪4907跟隨正股下挫，而4907跌穿計數位0.41元，亦按原定部署沽出，但就要追沽至0.395元才沽清，基本上等於白造一場。
港股大藍籌中，始終還是中移動（941）最強，昨日跌0.25元，收38.95元，但就仍企在5日線（現處38.90元）之上，現時10日線及20日線在38.25元至38.40元區域，守得穩可以蓄勢再升，到時會伺機收集。且看在今年最後4個交易日，中移動會否重見4字頭。
恒地36元收集
恒地（012）前日有收集手影，但昨日則與恒發（097）齊齊腳軟，股價跌0.85元或2.3%，收36.40元。早前在36.80元沽出一半貨，假如恒地今日再跌，會在36元至35.50元水平補回。
趙飛雲