大賓架柯清輝衣錦還校，返回母校英皇書院做八十周年頒獎禮嘉賓，威風到極，柯大班一九六二年入讀英皇中一，六九年考入港大，港大就在英皇對面，當年英皇學生入港大，幾乎係奉旨，唔覺意就行咗入去，好不令私立學校學生羨慕。
柯大班一九六九年入大學，即與鄭海泉大班相同，不過鄭大班讀中大，係四年制，故此遲一年畢業。東亞銀行副行政總裁彭玉榮又係一九六九年入中大嘅，嗰年嘅中學生出咗三位大賓架，幾好時年噃，柯大班在港大畢業之時（一九七二），佢嘅前任愛將，現在已升至滙豐總經理梁高美懿就入港大做新生，你話柯大班退休之日，梁總經理會唔會調過恒生接班呢？大家不妨開盤，賭番一餐福記晚飯。
柯大班畢業於英皇，梁太出自聖心（據左丁山記憶，希望冇記錯），皆一流名校也。呢日食午飯，賓架P與船務C讚嘆不已，話與柯大班、梁總經理兩位叻仔叻女相比，自己嘅「血統」都唔多醒咯。講起嚟，賓架P話佢自官立小學畢業，升上一間有中中部，英中部嘅教會學校，因官立小學係中文小學，讀中一追唔上啲英文，功課甚差，俾學校送出大門口，唯有去讀一間私立英文中學，一路掙扎，與柯先生、梁太之讀書順風順水，完全不可同日而語。不過，殊途同歸啫，賓架P自私立英中一直讀上嚟，入埋中大，今日係中環一條好漢，英文重叻過晒我哋班老友，唔到左丁山唔服。
船務C小學讀同一間教會嘅附屬小學，英文成績好就可以直升英中，否則就升上中中。船務C話：「學校只想有錢仔升上英中，我屋企冇錢，小六學期試，英文作文竟然得到四十九點五分，唔及格，被逼升讀中中。我嘅有錢同學嘅英文作文有五十一分，升上英中，到今日仍然好嬲學校搵笨。不過咁，我由中中考入中大，就憑中大畢業證書搵到份好工。反而我哋教會間英中，嗰年冇一個人考到入港大，同學嘅社會成就比較普通。」聽完佢兩個講，李國章局長應該搵佢哋做人辦，去學校宣揚。