旺嫂歐倩怡秘密學餅三年，終在近期推出製蛋糕的廚藝書籍，笑言男友郭晉安雖是其試味白老鼠，但對方例牌嗌好食，認真靠唔住，她又表示自己會靠廚房發揚光大，希望成為新一代cake后。
歐倩怡三年前開始上廚藝班，學製甜品蛋糕，近期師成下山，由她親自包辦的製蛋糕廚藝書亦告推出，日前歐倩怡到天后巧手製cake，才得二十六歲的她表現得相當專業。
安仔做白老鼠
不過，在鑽研製蛋糕的過程中，歐倩怡亦曾經過無數次試味、轉爐溫、焗燶蛋糕等各式各樣的成敗例子，其男友阿旺郭晉安固然是專用試味白老鼠，但歐倩怡笑說：「弊在佢係唔可靠嘅白老鼠，乜都話好食。」
問歐倩怡為何會愛上製蛋糕這門技藝？她解釋道：「其實我都諗咗好耐，自己應該學啲乜嘢，我個人比較實際，做演員嘅話，未必做到羅蘭姐咁有韌力，過多幾年又唔知會唔會畀娛樂圈淘汰，冇一門手藝，咁第日靠乜為生呢？都要自我保障。」至於安仔會否贊成她學製蛋糕？歐倩怡說：「可以自我增值嘅嘢，佢一定支持。」
雖然安仔事業起飛，但歐倩怡堅持時下女性應該建立個人事業，她說：「由我細個開始，我媽咪已經返工，到𠵱家五十幾歲都重返緊，佢都冇話攰，係因為冇原因要停止工作，要keep住，唔好脫節，咁樣同老公都會有多啲話題。」
開舖先要增值
問歐倩怡下一步會否開設自家蛋糕店，把美食發揚光大？她笑說：「開舖嘅話就要考慮埋管理同營運問題，又係另一門學問，可以進行，但等自己層次再高啲、增值再多啲先啦，做到cake后、女蔡瀾梗好㗎。」看來旺嫂真的不讓精製芒果湯圓的阿旺專美，要憑雙手創出廚房新天地。
採訪：朱倬誼 攝影：陳慧安
場地：廚櫃站
