元秋幫亞視拍處境劇《喜有此理》，唔經唔覺已經有好幾個月，馮仁昭噚日收到消息，元秋做到下個月十七號就會離開亞視，接拍成龍嘅新片。而元秋走咗之後，亞視準備搵好耐冇喺電視演出嘅森森頂替元秋嘅角色。
之不過，為咗保留元秋喺《喜有此理》嘅角色，聽聞亞視會安排元秋走去整容，整完之後就變成森森咁樣，呢條橋老土之餘兼冇說服力，咁樣交代森森出場，咪盞害咗久休復出嘅森森！
賀盧海鵬大壽
另外，李香琴前晚使五千幾蚊，喺佐敦某酒樓擺兩圍，率領亞視劇集《喜有此理》眾演員為好友盧海鵬慶祝生日，元秋重即場送上八支紅酒慶祝，一早到場打點嘅琴姐重同元秋以及成班朋友打牌耍樂，最後琴姐重一家贏三家，琴姐好開心咁話可以幫補找數。