薛凱琪（Fiona）大後日聖誕夜要出席新城勁爆頒獎禮，故早已訂枱約雙親平安夜鋸扒齊擦聖誕餐，自認冇人吼的Fiona更揚言餐後零約會，寧返家夢會周公迎佳節，免得開P後迅速凋謝又惹黑面及演唱失準閒言。
薛凱琪在大後日聖誕夜將出席新城勁爆頒獎禮，故早於兩個星期前已送皮鞋給父親、送媽咪兩個手袋作為聖誕禮物，同時已訂枱約雙親後日鋸扒，勁擦聖誕大餐，反而她本人則冇人吼、零約會。
日前Fiona在中環接受訪問時說：「咁早未收到禮物呀，邊度有人好似我咁癲吖，我驚時間唔夠，一見啱嘅就買咗先，跟住又忍唔到，買咗就好想送。舊年都有朋友送禮物畀我，ok啦，舊年都冇去玩，以前就成班人出去玩咯，𠵱家冇啦，節日係零人約，因為啲人全部預我要做嘢。」
一玩就好衰
Fiona既是後生細女，心癢癢想逛街約會本來很正常，奈何聖誕撞正頒獎禮，平安夜舉家飯敍後，緊接節目是歸家大被蓋過頭，她苦笑說：「一玩就好衰，又唱唔到歌，攞獎失聲咁點呀，玩得太攰，費事啲人話黑面啦！講真，今年我就冇新人獎，已經係舊人啦，唔係好大期望，有一個獎都好開心。」
跳《886》搞笑
此外，○六年將至，Fiona回顧過去一年聲稱無悔歌曲《886》舞步成笑柄，來年更要再接再厲跳多劑，她說：「新一年希望歌路再有變化，我鍾意快歌，所以會唱多啲快歌同跳舞，《886》幾funny，有人扮㖭。藝人係娛樂大眾，我每次live唱呢首歌，啲人都好開心，好過冇反應，畀到人歡樂咪ok囉。」
採訪：朱倬誼
攝影：葉君海
化妝：JessciaChan
髮型：JoLam、Mike@ILCoplo
服裝：Zucca（蝙蝠袖上衣）
場地：OneBar@ExchangeSquare
