財經雜誌《亞洲貨幣》（Asiamoney）繼上月初公布05年最佳經紀行調查後，噚日公布亞洲區最佳管理企業調查，全部都係喺香港上市嘅公司。其中大型企業組別，中國同香港嘅得主都係藍籌股，分別係華潤創業及利豐，最佳管理嘅中型企業，中國同香港得主分別係新奧燃氣及美聯物業，最佳小型企業就係勤美達及嘉利國際。
《亞洲貨幣》呢個每年一度嘅意見調查，訪問咗亞洲各國主要分析員及投資經理，了解佢哋眼中區內嘅最佳管理企業。呢批獲選名單嘅特色，其中之一係公司強調同股東關係。華創話，佢係恒指成份股中，首家兼唯一自願性詳細披露季度業績嘅綜合企業，可增加同投資者溝通。嘉利近年定期搞股東茶會，相信博得唔少好感。