噚日嘅投票結果一啲都唔意外，因為係人都知泛民主派嘅底線，就係要有時間表同取消委任區議員有投票權，特區孖寶星期一拋出一個微調方案，你叫人點接受，唔votedown係對自己唔住。
煲呔同肥龍都應知輸梗啦，陳太叫佢收回，其實係唔想佢兩位前手下太冇面啫，但係冇人領情，重害到一世英明嘅寶哥哥押錯寶，喺投票前重盲目樂觀話政改方案會順利通過。莫非入咗建制，做咗行會成員就會自欺欺人，睇乜都睇唔清楚？
寶哥哥被煲呔搞到糊塗，金勞詹就清醒得多，佢一早就訂咗冬至嘅機票飛美國，八方重笑佢可能要改期，點知又俾佢估中，果然飛到。另一個同老詹一樣有先見之明嘅係周梁，同係行會議員，佢阿姐就叻好多，都預咗今日飛，計得好準。
傳真︰2623-9278
電郵︰[email protected]