3隻新股包括廈門港務（3378）、西王糖業（2088）同埋利君藥業（2005），昨日一齊急升，廈港急升10.88％，收1.63元，西王升7.35％，收1.60元，至於利君亦升10.87％，收2.55元。
經紀黃話，3隻股喺招股之時受到熱烈追捧，搞到貨源好分散，成街都有貨，所以要花較多時間才可以收齊，收夠貨要升自然唔難，至於點解佢哋噚日會一齊發力？經紀黃話純粹係巧合而已。
另外，老虎仔隻遠東發展（035）日前公布中期業績，盈利倒退32％至1.4億元，如果唔計重估物業價值呢一筆，盈利更只得千零萬銀，實在叫人失望，難怪遠展昨日一度低見2.55元，收2.60元，跌0.95％，成交股數有630萬股，金額1630萬銀。
經紀黃話，遠展股價已經低迷咗好一段時間，但論資產淨值，每股值7元樓上，較現價有好大折讓，而遠展喺澳門嘅發展計劃已經傾掂，因此唔應該對隻股睇得太淡。
慕容小初