大記者去維園、灣仔參加示威，唔係為咗反對世貿，而係為咗近距離觀察示威。香港有一千名記者報名為世貿記者，其實唔係有咁多人報道世貿。小Ｇ就話過畀左丁山聽：「我哋全部報晒名，攞番張記者證，預備不時之需，萬一有同事臨時唔掂，我可以即刻上陣。放工後，我都可以去會場行吓，見吓大場面。」
大記者抱好奇心態參加示威，做記者，如無好奇心，不如轉行。據大記者講，佢哋兩三個人，見到啲南韓農民個子不高，但非常紮實，馬步甚穩，於是有意無意之間，一齊撞埋去，一位農民郁都唔郁，對佢哋微笑，跟住向大記者佢哋一撞，三個人一齊彈開幾步。大記者話：「人哋受過軍訓，當過兵，全部學跆拳道，而且日日在田野勞動，體力真係勝我哋香港人幾籌，香港警察會唔夠佢哋揮。」
南韓人嘅服從性、紀律性好強，香港人瞠乎其後。惡佬明以前曾在南韓建築公司地盤做過，南韓僱員自成一隊，大佬一聲令下，下屬莫敢不從。有一次，地盤下面挖好咗地庫，成為蚊竇，香港工人冇人肯落去滅蚊，南韓大佬叫一位南韓經理落去噴殺蚊水，經理雖面有猶疑之色，拎住罐殺蚊水就撲落去地庫，五分鐘後上番嚟，滿面、手臂，全部紅腫，惡佬明問佢：「你唔怕嘅咩？」經理話：「怕到死咗，不過老闆有命令，點都要執行！」惡佬明為之服晒，因為香港嘅標準做法，係去搵殺蟲公司，派人穿好全套護身裝備，先至落去地庫噴殺蚊水也。南韓公司就可以為咗效率，慳成本，派個敢死隊去滅蚊。
但係為咗個人及團體利益，南韓農民就唔肯服從政府訂下嘅國策咯，南韓工業得自由貿易之利，電子產品、汽車、鋼鐵大量進入世界市場，𠵱家得到嘅利益，農業完全冇得比。南韓三星手機可以暢銷泰國，但便宜七倍嘅泰國米就好難打入南韓本土市場，呢啲叫做「公平貿易」？泰國農民應該搵樂施會、鄧燕娥等傾吓，問吓點解。