噚日立法會一早就迫滿咗記者行家，因為政改大戰在即，火頭四起，煲呔喺香港會擺陣；而啲轉軚高危議員，就更要搵人盯住。
開始之時，行家都心諗有排講，三日都未必完，點知劇情急轉直下，因為民主派忽然收口，兩吓就以少數否決咗煲呔同肥龍有關特首新選舉安排嘅方案。當大家重喺度估緊今日要傾到幾點之時，忽然有位女士走入記者室，逐一通知啲記者，話范太今日唔請大家食早餐，即係冇黐飯、腸粉、油炸鬼同白粥食。
當時位女士冇講點解，八方諗，范太冇理由咁孤寒，啲記者九點要去立法會採訪，真係抵請啦。
原來到咗晚黑，八方先知范太已經計到數，就係噚晚會搞掂，今朝記者唔使再去立法會，可以放聖誕假，買晒啲早餐冇人食咪好浪費。
傳真︰2623-9278
電郵︰[email protected]