「你睇，啲葉蛀到成個網咁，好似Lacy呀！幾靚！」「靚?!好彩我哋用袋套住啲矮瓜咋，如果唔係俾28星瓢蟲蛀爛晒，你就唔會話靚㗎喇！」看住啲蟲不停鑽，鑽到一個窿，剛好是那圓碌碌身形的大小，其實很有趣，不過，見到啲矮瓜千瘡百孔又好鬼心痛，所以都係包實啲瓜！但啲蟲無瓜食，就轉移目標，食葉。「你咪以為食葉就無事，啲矮瓜無咗綠葉進行光合作用都係唔健康㗎！」「所以搞到啲矮瓜唔再紫，變晒白色？」阿標即時俾我激到跌咗落地，「有無搞錯呀！呢啲係象牙茄，有次我哋去泰國旅行見到，你話要買啲種子返嚟試吓種，點知原來好適合香港氣候。象牙色肉較實味一樣，彎彎哋十足象牙咁款。」又係喎，那次，有位菲律賓朋友請我們吃飯，煮了個大喜慶才吃到的KareKare貴賓菜，先把牛尾煮45分鐘至腍，另炒香蒜頭洋葱，再落蒜鹽、糖、花生醬，最後落煮好嘅牛尾、香蕉花絲、青豆角和象牙茄，兜勻伴飯吃，我記得真係好好味，好味嘅嘢，無理由我會唔記得㗎?!（五十九）
阿花