李嘉欣前晚出席Motorola喺上海科技館舉行嘅活動，佢以暖笠笠皮草配條性感裙做戰衣，問到佢身上件皮草係咪幫襯龐維仁太太黃美儀間IceHouseFur買嘅，或者直頭係龐維仁送嘅呢，嘉欣話：「吓，我有好多朋友送禮物畀我，喺你哋眼中佢（指龐維仁）好似好特別，但係我自己就唔覺啦，我諗見面就係朋友，唔見面就唔係朋友啦。」咁即係同龐維仁重有冇見？嘉欣話：「冇反面嘅人就仍然係朋友。」至於兩人重有冇一齊睇戲呢？嘉欣嘅答案係：「影到咪有，影唔到咪冇囉，我覺得外間對藝人拍拖參與太多意見啦，愛情係自己同對方嘅事，唔需要同外界交代。」
「黎明樂基兒好匹配」
此外，有報道又話龐維仁同黃美儀其實未離婚，嘉欣一臉事不關己咁話：「唔關我事，我唔會問朋友咁深入嘅問題，例如今日着乜嘢顏色內衣咁。」最後提到黎明同樂基兒拍拖，嘉欣就話：「佢哋靚仔靚女，好匹配。」
