日股意氣風發，大升316點，破上次高位，較年初升39%。港股升得52點，市場焦點擺響建行（939）。建行新高，收2.675元，進帳3格，C輪各有各表演。炒家買建行C輪，輪商買正股戥住，又扯高正股，正股上升，又復帶動C輪。
有建行帶住個市，個市都係繼續向上，而銀行股有連鎖效應，銀行C輪望多兩眼有着數。
滙控C輪3400：滙控（005）收126.30元，爬高0.20元。聖誕鐘就嚟響，滙控即使炒唔上，都唔會唔掂。1個唔覺意，炒落後，炒高三兩蚊，揸咗C輪肥到綁唔到鞋帶。想搏殺，揀滙控C輪3400，隻輪明年4月初夠鐘，輪價22.4仙，溢價2.3%，槓桿率56.4倍（有效24倍），引伸波幅11.2%。隻輪槓桿率勁，爆炸力強，買隻輪自然要畀啲溢價，但2.3%溢價唔算高。正股如果升3元，隻輪理論價起57%。
中銀C輪9068：建行與滙控睇好，中銀（2388）亦可睇好。中銀昨升0.10元，C輪9068升得1仙，唔夠數。
9068明年6月27日夠鐘，輪價49仙，溢價3.5%，槓桿率30.3倍（有效14.4倍），引伸波幅13.7%。正股起2%，揸隻輪有權搵3成利潤。
章盛