恒指昨日雖然上升52點，但就貼近全日低位收市。以收市價計，恒指算是高於月初高位，亦稍為升破頸線，叫做出現突破走勢，恒指今日不宜跌穿15200，否則假突破的機會頗大。
外圍日股昨日高見16010，再創今年新高，亦是00年12月以來高位。日股上周五稍穿15100水平，本周連續3日急升近800點，再次成功破頂，真係強到你唔信，正是升市莫估頂的最好寫照，嫌貴可以唔高追，但就千祈咪手多多逆勢造淡。
相反美股就連跌4日，不過累計跌幅唔算大，加埋只係78點，周二晚收10805，守穩10730-10700支持區，可反覆再升。
綜合而言，今年最後4個交易日，只要日股後抽守穩15900，杜指試底唔穿10700，港股守住萬五之上造年結應無問題。
大市較預期早一日破位，吼位補回恒地（012）及滙控C輪4907的如意算盤自然打唔響。恒地昨日走勢有啲異常，開市不久即有大買盤將股價掃高至38元，跟住任由股價回落，但跌到咁上下，又有大手買盤掃一輪，恒地最後收37.25元，升0.45元或1.2%。表面上升幅大為收窄，高位沽壓唔細，但睇真啲則似有人正在收貨，今日若見36.80元守得穩，可能要買番轉頭。
4907計數位0.4元
滙控（005）昨日亦是先高後低的走勢，收126.30元，升0.20元，現時仍沿着5日線上移，屬於強勢。C輪4907升2.5%，收0.415元。現調整策略，將4907的計數位推上0.40元，確保不致空手而回。
趙飛雲