中環成日傳花旗環球金融亞洲區嘅頭頭、即係紅籌之父梁伯韜唔撈，咁啱華華噚日就喺越秀房託嘅上市儀式上，見到佢同越秀房託董事長梁凝光喺度密密斟，當然要捉住佢問個究竟。佢同華華講，自己到噚日為止都重喺花旗度做嘢，其他就冇乜再講啦，重叫華華做咗啲正經嘢先！
雖然佢乜都唔肯講，但係空穴來風未必無因。有傳言話番薯梁想自己搞番檔嘢，專門投資一啲有潛質嘅公司，上唔上市都得，𠵱家正在組班階段，四圍咁搵人，所以單料漏咗出嚟。有人更實牙實齒話，佢老哥最快會喺出年年頭離開工作4年嘅花旗喎。
姑勿論傳言係真係假，佢有份做嗰隻越房噚日掛牌，最後埋單升成13個巴仙，總算無愧「紅籌之父」嘅威名啦！
李潤芳攝