不足一百磅的唐寧養了四隻寶貝狗，包括活躍金毛尋回犬、愛扮大佬的癡肥比高犬、八卦PR西施及忠心耿耿的孤兒唐狗。唐狗Yellow與主人曾經歷相依為命的時光，因而建立深厚情誼。
唐寧是出了名的狗癡，養了四隻不同品種的雄犬，包括原產英國蘇格蘭的兩歲金毛尋回犬BoonBoon、祖先為古埃及小型獵犬的四歲比高犬豆豆、原產西藏的九歲中國宮廷西施狗BB及六歲流浪唐狗Yellow。
豆豆撩事鬥非
日前不足一百磅的唐寧拖着四隻狗在大埔散步，癡肥的豆豆大肚腩貼地，加上毛色似乳牛，連唐寧都嘲笑牠似豬又似牛。散步期間遇上市民放狗，豆豆即狂吠，但當狗仔埋身時，豆豆竟轉軚搖尾巴。唐寧嘲笑豆豆說：「你好渣，得把聲，虎背熊腰，最怕事係你，任人魚肉。佢閹咗之後變肥，最肥嘅時候超過四十吋腰，𠵱家重食緊減肥狗糧。」
最嬌小玲瓏的BB就夠嗲，故牠冧得掂BoonBoon，與豆豆亦算老友。而Yellow因為曾被遺棄，所以比較獨立，而且對主人忠心耿耿。唐寧說：「以前我朋友喺南丫島有band房，嗰時喺島上識咗Yellow媽咪乙乙。乙乙係流浪狗，成日都保唔住狗BB，唔係俾水沖走，就係俾漁農處捉咗。後尾我攞咗Yellow返嚟養，可能佢跟過媽咪流浪，對人會有戒心，不過Yellow好跟我，由細到大都要我抱，係屋企嘅護衞員，專睇門口，曾經有段時間我搬出去住，Yellow就陪咗我一年。」
金毛犬最熱情
雖然Yellow是唐寧最寵愛的狗仔，但她一樣疼錫其他三隻狗，唐寧說：「BB好似人咁，佢乜嘢都要知，成個PR咁，最鍾意招呼朋友。金毛尋回犬BoonBoon雖然最大隻，有九十二磅，但係其實佢係BB，佢好熱情、又活潑，最鍾意坐上櫈扮人，負責睇枱面有乜嘢食。豆豆就鍾意匿窗簾底，一出街散步就聞地下，有嘢食就最開心。」
採訪：朱倬誼 攝影：何國豪
