文華東方酒店（舊嗰間）做埋呢個聖誕節，下個禮拜三就收工。聽講當日同班員工farewell之後，一點鐘就會鎖門。希爾頓拆咗，富麗華又冇埋，𠵱家連文華都收檔，跑立法會新聞班行家想蛇王飲杯咖啡，都唔知去邊好。
霍公子文華歎茶
噚日立法會又做大騷，泛民主派二十幾個議員一心送個大聖誕禮物畀聖誕權（煲呔之前嘅一個花名，因為金融風暴嗰年佢口輕輕話香港經濟聖誕節就會復甦，情況同今次佢拍心口話𠱁得掂班民主派一樣），咁好睇嘅戲，八方當然要由將軍澳撲過海，不過諗住班大哥大姐口水多多，每人講十五分鐘，講到天黑都未講完，於是趁機去文華咖啡室飲杯茶，緬懷吓呢個充滿殖民地味道嘅好地方。
一坐低就見到霍公子。咦，乜佢唔使開會唔使發言咩？霍公子笑笑口話自己唔係主角，冇乜嘢好講，跟住霍公子個電話就響，係佢個助手急call，話冇乜人發言，就快投票，請佢火速趕返議事堂。喂，當時不過五點幾，咁快？原來泛民主派班人玩嘢，派最多人傳會轉軚嘅譚香文打頭陣表態企硬之後，故意唔發言，用速戰速決方法等政府冇機會盡最後努力去游說。政府咁就全軍潰敗。
霍公子急急腳咁走，八方亦跟住埋單，諗住跑去立法會，點知一出門口就遇到熟人──就係前任財政司司長梁錦松。阿松無官一身輕，全力湊兩個細路同埋搞「小母牛」（係一個慈善組織，幫助落後地區嘅農民）做義工；佢話「𠵱家冇晒壓力」，但見到八方，都問吓立法會係咪重傾緊，又認為詹培忠應該會投贊成票；不過最後嗰句，佢都係話自己「𠵱家唔理」，亦唔使理呢啲嘢囉。
形勢嘴臉日日新
文華啲芝士餅，十年如一日都係咁好食，政治呢味嘢就日日唔同。阿松由權力中心到中環一個過路人，不過兩年間嘅事。黃仁龍幾個月前喺法庭指點江山，點諗到要耷低頭被長毛奚落；至於今日支持○七、○八普選明日就話循序漸進，今日對市民豎起隻中指聽日又話人唔尊重民意，亦係變得快到冇人跟得上。既然大局已定，都係無謂咁匆忙，坐低飲多杯咖啡好過。
傳真︰2623-9278
電郵︰[email protected]