「細佬仔」唔識「新世界」，上個禮拜惟有掟番超過1億股出街，令到持股量降至5%樓下。咁樣，第日再減持就無需要公布。今個禮拜一二，新世界沽壓繼續，相信係「細佬仔」喺度出貨。噚日隻股反彈番6毫報11蚊收，中環靈通消息話要沽貨者沽得七七八八，而早前做白武士嗰班「獨立人士」，接咗成手貨，都要做啲嘢，如果唔係帳面輸咁多年結時唔好睇啫，但證監又出手阻其中一個人接貨，小股東要識執生至好。
有人話「細佬仔」今次狙擊失手，唔夠彤叔（圖）玩，但佢賺咗幾億噃，都唔算輸得晒。反而彤叔畀佢殺個措手不及，迫到要使出批新股呢一招，為公司管治樹立一個最佳嘅反面教材，贏咗都係慘勝。