【本報訊】「我八十幾歲人從未見過咁多錢，個心係咁跳。但我一生做人都係忠忠實實，見有咁多錢喺個袋裏面冇諗過攞咗佢，心諗個物主跌咗咁多錢一定好大件事，可能會跳樓㖭，愈諗愈唔安樂，希望快啲報警解決件事就安心囉！」前日早上在黃大仙東頭邨彩東樓對開東隆道路旁，拾獲四萬七千元巨款但未有據為己有，結果物歸原主的八十二歲婆婆黃月玲，昨憶述事件時言談間不禁露出一份自傲。「同一時間有另一個婆婆見到啲錢，佢想攞走一啲但俾我喝住。我叫佢返屋企報警先，啲差人到嚟帶咗我兩個返差館。」
獲贈千元茶錢
在黃婆婆與另一名婆婆協助調查期間，因趕着送兒子上學、在登上的士時遺下四萬七千元豬肉檔貨款在路旁的姓羅（三十五歲）女事主，報警後數分鐘即接獲警方「好消息」趕至警署。羅在黃婆婆確認為上的士時遺下巨款的物主後，獲警方歸還失款，即時向黃婆婆等人道謝。
「啲差人提醒佢應該畀番啲茶錢我哋，有份報警個阿婆爭住要，結果有五百蚊茶錢，我就覺得佢太貪心。佢哋又要俾二千蚊我，我起初唔肯要因為幫人係應該嘅，但推咗好耐都推唔甩結果最後收咗佢一千蚊，皆大歡喜囉！」