香港第3家註冊嘅航空公司中富航空，噚日同波音公司簽約買飛機，重特登搞咗個酒會慶祝，除咗兩家公司高層，行會召集人梁振英都有到賀，唔知有冇順便叫人支持政改！呢個酒會屬私人性質，唔歡迎記者，而中富董事長陳峰（圖右）一簽完約，又第一時間入lift走人，一眾傳媒惟有照跟，結果陳董同大家遊咗一輪電梯河，始終口密密，無乜料爆！
據華華所知，中富今次睇中咗波音嘅B737-800同埋B787兩款機種，計劃喺5年內分別買入30架及10架，以兩個機種分別值6600萬美元及1.3億美元計，呢項交易未計折頭，金額就高達38.8億美元。咁大投資，相信陳總對前景都真係好有信心喎，咁點解咁驚傳媒問呢？