大班朋友圍埋打邊爐滾吓滾吓固然開心，但一個人去歎一人一鍋又唔等於慘喎！一個人打邊爐夠衞生，又唔使等齊人，最重要係夠平！今晚無人約？重好啦！
記者：陳慧茵
攝影：何家亮、譚盈傑
八點後慳幾蚊
3年前開始加入一人一鍋，今個秋冬火鍋改名叫「海盜船」，公關話因為推出嘅三款火鍋材料都係以海鮮為主，包括帆立貝、象拔蚌等，計我話，想取海盜船滿載而歸嘅寓意先真。
湯底：3款湯底任揀其一，包括花旗參紅棗湯（右圖）、芫荽皮蛋湯及沙嗲湯，花旗參湯底係今年新推出款式。
食膽（無論你揀邊款火鍋料都會隨碟跟埋嘅雜錦材料）：澳洲肥牛4片、蝦2隻、雞4件、魚蛋蟹箝2隻、南瓜、粟米、冬菇、金菇、枝竹、豆腐、生菜、白菜仔、粉絲、米線
有乜好食：湯底加入紅棗夠滋潤下火。雞件連皮上，較一般打邊爐的雞片香滑，南瓜片打邊爐夠新穎健康，用百福豆腐，質地香滑但夾時易散。
帆立貝海蝦肥牛鍋$49
（8:30pm後$45）
所有帶子來自菲律賓，經過QC揀啱差唔多size先可以一齊上碟，睇落去4隻帶子又真係差唔多大細喎！帶子質感彈牙，略帶鮮味，美中不足係size較細。
象拔蚌海蝦肥牛鍋$48
（8:30pm後$43）
總共有5塊象拔蚌，size唔算細，睇落有光澤，食落有象拔蚌嘅鮮味，以快餐店質素嚟講算係好唔錯喇！
食快餐睇NOW+上網
美心快餐計劃未來2年全面改裝成美心MX，每間分店都會安裝電視，食客可以邊食邊睇NOW寬頻的節目，重會加裝埋無線上網平台，全面cyber化。
食客話……
全線美心快餐（鰂魚涌康怡廣場店：28855095）
50蚊蠔鍋食得豪
作為首創一人一鍋的龍頭大哥，不得不佩服大家樂時刻的創新諗頭，除咗以往口碑不俗嘅東星斑同鮑螺片食材外，今年更加推出珍珠蠔火鍋，50蚊左右就可以食到貴價海鮮，超抵！
湯底：沙嗲湯底係必搭款式，另一邊可選豬骨湯、紅棗湯，或輪流推出的香茜皮蛋及沙參玉竹湯。
食膽：加拿大肥牛5-6片、雞2片、豬3片、蝦2隻、冬菇、枝竹、冬瓜、粟米、豆腐、鮮蝦麵、米線，生菜
有乜好食：豬骨湯用豬骨及雞熬足8個鐘。另以鮮蝦及魚肉打成的鮮蝦麵，口感彈牙，味濃，唔好俾佢呃倒以為係烏冬喎！
珍珠蠔火鍋船$50
（8:30pm後$46）
嚟自日本嘅珍珠蠔外形肥美爽身，海水味唔太重，就算唔食蠔的也接受得到，3隻份量啱啱好，重有推介去殼開邊的蝴蝶蝦，勁爽甜！
全線大家樂（海港城店：21750181）
唔蝕底火鍋泡飯
只限銅鑼灣分店推出嘅火鍋套餐，用上最耍家的魚湯作為火鍋湯底，以大眼雞、鯪魚、大魚、牛鰍魚等多種鮮魚熬製而成的魚湯，總廚錦哥話食到最尾嗌個白飯加埋落啲湯入面，煮成泡飯食就最正。
湯底：皮蛋芫荽湯、麻辣魚湯、木瓜魚湯及豬軟骨湯。
食膽：肥牛5-6片、小籠包2個、粟米、鮮枝竹、冬菇、金菇、生菜、米線
有乜好食：木瓜魚湯味道清甜，加入木瓜雪耳更加滋潤養顏；麻辣魚湯勝在夠創新，濃辣惹味。小籠包打邊爐夠晒特別，注意不要淥太耐以免穿皮。
魚腐小籠包鍋$65
用上店舖馳名的順德魚腐，入口鬆軟，中央滑溜，保持一貫水準；另外也有豬頸肉、腐皮卷、菜肉餃及魚皮餃等「非一般一人一鍋」材料提供。
魚米家（25721361）
地址：銅鑼灣禮頓道21-23均峰大廈地下
營業時間：7:00am-12:00mn（火鍋晚上6點後開始）
其他滾鍋推介
要暖笠笠除咗烚吓烚吓以外，重可以選擇吓一品鍋同煲仔菜，一樣可以同自己驅寒！
黑豚肉和風一品鍋$48
十足東瀛味
以麵豉湯底煮成嘅一品鍋，放棄傳統肥牛，取矜貴黑豚肉作為主要配料。豬腩位肥瘦均勻，肉質嫩滑，刻意煎香豆腐的一邊，跟足和風食法，加埋鮮魷、蟹柳、日式魚蛋等配料，同打邊爐一樣咁有風味。
太興燒味餐廳（27220701）
地址：新文華中心地下75-79號
營業時間：7:00am-12:00mn
紅燒斑腩煲$33 絕對飽肚
要平、飽肚、暖笠笠三樣齊全，大快活新出嘅呢款紅燒斑腩煲就最fit，送埋番茄薯仔豬踭湯、白飯及中茶一杯，一定飽肚！
全線大快活（新世紀廣場店：26289919）
