肥龍同黃仁龍係近年皇仁書院最威校友，八方聽聞，肥龍嘅中學同學上個星期擺咗幾圍酒，賀佢老哥榮升做政務司司長。
其實呢個祝賀嚟得真係遲咗啲，因為佢老哥正為世貿同政改頭都大晒。有份食嘅皇仁仔就話一啲都唔覺肥龍好着緊，佢𠵱舊談笑風生喎。梗係啦，佢知道自己冇乜好嘢出台同泛民交換，所以就冇乜所謂啦！
唉，肥龍個逐步削減區議會委任議席又的確肉酸，難為佢重講到自己好謹慎咁嘅款，有位政界大哥就恥笑佢，○八年留番六十八個位做乜鬼，十八個區議會分，每個得三點七席；到咗二○一二年更搞笑，睇情況或者保留三十四席，即係話每個議會有一點八席，真係唔知有乜用，莫非個會冇咗嗰一點八個社會精英，就會水準低落至冇法接受？如果係真，就要重估我哋啲民選區議員質素，係咪咁差勁嘞。
爆料熱線：29290000、27860099
報料傳真：26239278
報料電郵：[email protected]