恒指變化輕微，有啲假日氣氛。C輪唔跟正股，例如正股升而C輪唔升，又或者正股冇跌而C輪跌。剩番6個交易日，就轉月份兼轉年份，窩輪溢價收縮，或者引伸波幅收縮，好正常。
中財險C輪9513：中財險（2328）收2.15元，升5仙。C輪9637收17.4仙，升7.4%，呢隻高溢價高槓桿率嘅C輪，交投金額得2萬，唔使理。
中財險落後其他保險股好多，追番上去有厚望焉，搵C輪炒，可揀9513，明年3月初夠鐘，輪價21.1仙，溢價2.8%，槓桿率10.2倍（有效7.6倍），引伸波幅30.6%。隻輪昨日冇跟正股上去，反跌2%，未來幾日唔怕溢價再縮。成交9球，成交額184萬，唔得熱鬧。其他中財險C輪重弊，成交金額冇隻超過8皮，數據更加拍馬比唔上。
新世界C輪：新世界（017）再跌0.35元，收10.40元。兒童基金賺錢出貨，市場仍然擔心重有貨尾清倉，買家縮手。新世界C輪隻隻散，最大跌幅係9044，散35%，最淒涼時候散夠47%。
9044明年2月初到期，輪價84仙，溢價4%，槓桿率12.4倍（有效8.1倍），引伸波幅39.4%。各輪中，要博就博呢隻，不過要等正股回至10元先至諗。
章盛