會好失望
新界西選民吳小姐：「我係支持泛民主派，我希望爭取到盡快有普選時間表，亦反對政改方案。如果佢哋真係轉軚，我會好失望。」
唔再投佢
新界西選民丘先生：「我鍾意陳偉業呢個人，相信佢唔會轉軚。我好反對政改方案，如果佢真係轉軚，我以後唔投佢。」
支持政改
新界西選民聶先生：「我係陳偉業、梁耀忠嘅支持者。我想普選，但係支持政改方案，因為普選都要遲少少、一步一步嚟。」
會睇清楚
九龍東選民黃同學：「我希望泛民幫我哋爭取到普選時間表，如果議員轉軚支持政改方案，我會好失望，再要睇下佢哋地方工作，再決定係咪投佢哋票。」
驚佢轉軚
九龍東選民薛先生：「如果鄭經翰今次轉軚，我以後都唔會投佢票，議員要向選民交代，唔係向曾蔭權交代！佢同曾蔭權咁熟，都真係驚驚地佢轉軚。」
唔投佢哋
九龍東選民陳先生：「如果泛民主派轉軚，我會唔投佢哋票，我當然希望政改方案過唔到，要有普選時間表！」
點都唔投
九龍西選民陳小姐：「劉千石、馮檢基呢幾年都太少理民生，我對佢哋已經好失望。政改、普選都變咗佢哋政治籌碼，無論佢哋轉唔轉軚，我下次都唔投佢哋！」
始終支持
九龍西選民江太：「普選梗係愈快愈好啦！如果馮檢基同劉千石無端端支持政改方案，我都會投佢哋票嘅！因為佢哋喺地方工作做得好呀！」
