琦琦昨日在澳門出席HelloKitty活動，推廣旅遊塔將於聖誕節期間展出的迷你版著名景點。擁有無數Kitty公仔的琦琦表示渴望有一隻會唱歌的Kitty。
琦琦、何超瓊及何超蕸等昨日在澳門出席「澳門旅遊塔與HelloKitty齊向澳門歷史城致敬」活動。趁聖誕佳節，澳門旅遊塔將展出迷你版的著名澳門文化景點如大三巴牌坊及東望洋炮台等。
本身是HelloKitty迷的琦琦大談Kitty經，她說：「以前我去日本做嘢，一得閒就會去SanrioLand，曾經成屋都係Kitty公仔同擺設，結咗婚就陸續送畀人，𠵱家都重佔咗間屋嘅四分一位置。」
收巨型公仔晒命
琦琦續說：「老公知我鍾意HelloKitty，試過將十幾隻Kitty擺晒喺架跑車𠱁我，又試過搵廠做一隻同我一樣高五呎十一吋嘅Kitty送畀我，佢對呢類公仔冇興趣，佢嘅興趣要使好多錢，好似跑車同相機，不過我都好支持佢嘅，啲錢搵得咁辛苦，梗係要用嚟使㗎啦。」
雖擁有無數HelloKitty，但琦琦現時最渴望是擁有一隻會唱歌的Kitty，問她囡囡對HelloKitty有沒有興趣？琦琦說：「逢係識發聲嘅公仔，佢都鍾意，工人成日喺屋企將所有發聲公仔一次過上鏈，放音樂畀佢聽，佢就好開心，我唔會特別薰陶佢鍾意Kitty，𠵱家佢似乎最鍾意Keroppi啦。」
採訪、攝影：RitaLeung
