李彩華兩母女近日先後在內地遇上賊人，李媽媽被人搶金鏈，幸好金鏈勾在珠片衫上，故並沒有財物損失。而阿Rain則表示在內地除遇過扒手偷銀包外，連飯盒也曾被搶。
李彩華（阿Rain）的媽媽日前獨自到廣州探親，當日中午時分，在熙來攘往的街道上，竟被當街搶金鏈，幸好金鏈被珠片上衣勾着，沒有損失財物，只是虛驚一場。
「個賊行衰運」
李媽媽日前回憶遇搶匪猶有餘悸地說：「我突然發現有個男人行近，佢好快咁伸手大力扯我條金頸鏈，結果我感覺條鏈同玉墜都跌咗，嗰個人就係好快咁走開。」
李媽媽驚魂甫定後，發覺上衣的珠片勾着那條金鏈和玉墜，算是不幸中之大幸，李媽媽說：「我又唔覺自己唔好運，反而覺得個賊行衰運。」
對於媽咪被搶劫，阿Rain並沒有顯得太過擔心，她還說：「因為我都試過喺內地做嘢時俾人偷銀包，好彩當時一大班朋友跟喺後面，朋友即刻發現，我哋重當場捉住個賊仔，將佢交咗畀公安處理。」
再買外賣醫肚
不過最搞笑的一次，阿Rain謂自己俾人搶飯盒，結果要再買外賣醫肚。阿Rain說：「內地嘅治安真係比香港差，所以上親內地工作，我啲財物都盡量唔露眼，費事引人犯罪。」
採訪：比華利
