葉璇唔知係唔係芳心寂寞，跳舞跳到上北京，搞到俾周刊影到佢同有「殼王」之稱嘅富商兼有婦之夫陳國強跳舞，重跳到好親熱，報道更加形容當時葉璇不停用身體摩擦對方㖭！
前言不對後語
噚日新城安排咗葉璇接受訪問，大批記者聞風而至，點知葉璇拒絕受訪，似乎有意迴避呢單新聞。結果記者守候多時，終於等到葉璇肯接受訪問。一講到佢同陳國強「熱舞」嘅問題，葉璇話：「我喺個舞池跳舞，都唔知陳國強喺側邊，我都唔識佢。我已經練到百毒不侵，我唔想影響佢（陳國強），我食得鹹魚抵得渴。」
至於葉璇同陳國強俾報道形容為表情「欲仙欲死」，葉璇就笑笑口話：「梗係啦！個舞池咁迫，佢梗係『揦』住塊面啦！」咁點解既然葉璇話唔識陳國強，但跳完舞之後又上咗人哋架車呢？葉璇解釋話：「嗰晚跳完舞咪識囉！」葉璇前言不對後語，究竟佢幾時先會講真話呢？