原來少咗WTO示威陰影，個市可以彈得好好睇睇。鬼佬年關在邇，炒輪搵食，都係諗C輪嗰便。
平保C輪3827：平保（2318）跟住國壽（2628）行，國壽曾見6.80元，繼續見近期新高，收6.75元，升1格，啲國壽C輪有啲攰攰哋。平保曾見14.30元，埋單平收14元，作勢向上，吼C輪。
平保C輪有兩隻彈升11%以上，佢哋係3646同9231，兩隻輪交投唔得，數據亦唔係特別靚。要揀對象，梗係3827，夠晒長壽，明年6月中到期，輪價20.9仙，溢價2.6%，槓桿率6.7倍（有效5.4倍），引伸波幅25.5%，咪睇槓桿率好似唔多夠爆，正股上到15元嘅話，隻輪值30仙齊頭，揸隻輪有權賺44%。
建行C輪9983：建行（939）最高2.60元，平上月下旬高位，收2.575元，升1格，亦平最高收市價，成交金額11.7億元，僅次於滙控（005），幾乎大增2倍，呢鋪嚟真。揀C輪炒，搏殺啲，向2107埋手。想穩陣啲，揀9983，昨收32.5仙，就當本月5日首日掛牌（最高39仙，當日正股最高2.60元，同昨日相同）之時上車，𠵱家買，買平過當日。隻輪昨成110球，係前市嘅5倍，幡竿豎起咗，炒家埋位開始做嘢。
章盛