世貿示威雖有不愉快事件發生，但香港總算大步檻過，示威群眾之亦柔亦剛，令港人大開眼界，香港警察亦上了寶貴一課。世貿冇事，港股亦立即發力，衝上15200大關，收15182，大升153點，成交210億元。期指收15220，高水38點。
恒指已拋離10日線（15009）同20日線（15034），同時升破由10月初伸延的降軌，好大機會出現突破，升穿12月2日的15232高位即可確認，初步目標15500。
大藍籌全面向上，滙控（005）終於升破126元的大阻力，收126.50元，升0.90元，MACD亦出現「雙牛」入貨訊號。今次滙控破位而上，顯示長達1年的中期調整完成，初步目標135元。
長和開始有番勢，不過，長和暫時重係畀大戶舞來舞去，表現都幾飄忽，但若大戶發動攻勢，升勢將會好急。長實（001）已重上10日、20日同50日線之上，短期目標係複式頭肩底頸線83.20元，整固後再上，可見89元。和黃（013）已重越10日線，但受制20日同50日線，升破後走勢可轉強，初步目標係上月底高位76.70元，下一個位，係下降軌所在的79元。吼C輪，長實係9056，和黃係9043。
領匯（823）震完倉，大戶又明刀明槍，掃番上去收15.05元，升0.95元。資料顯示TCI本月7日同8日又再增持，使持股量上升到18.35%，但唔知過去幾日有冇動作。領匯上到呢啲位，重係見到大行係咁買，佢哋睇幾多？日後又會有啥動作？點甩身？我哋又可以上一課。
C輪可吼9059
港股今次由低位回升，地產股遠遠落後，但息口好大機會在未來一季見頂，到時候，地產股將係最大嘅受惠者。長實已講過，新地（016）噚日亦開始發力，收75.55元，升0.5元，又拋離10日同20日線，短期阻力在上月底高位76元，一破位而上，最小量度上升目標係79元，中線可重上9月初高位82元。
新地C輪可吼9059，收0.35元，06年4月到期，溢價3.9%，槓桿率21.6倍，升穿0.36元阻力，可見0.45元。
郭兆誠