古巨基前晚在九龍灣國際展貿中心舉行音樂會，at17、王菀之和林海峰擔任表演嘉賓，林海峰出場時笑言舞台似告士打道，隨即更大叫「DownDownWTO！」十分搶鏡。
前晚古巨基在九龍灣國際展貿中心舉行「1218向古巨狂呼」音樂會，三千多名歌迷捧場。音樂會尾段時，不少歌迷站在櫈上揮動螢光棒，氣氛熱烈感人。
摸重要部位
基仔介紹at17出場時，幽自己一默說：「唔知大家有冇睇我《歡樂滿東華》表演魔術呢？第日有報道話我變魔術時掂到人哋重要部位，其實張相係有視覺上嘅錯誤，不過我𠵱家表演呢個魔術，真係會掂at17嘅重要部位。」
接着基仔便摸着at17的頸部說：「對於歌手嚟講，喉嚨係佢哋嘅重要部位。」此話一出，即引來全場歌迷大笑，恰巧當晚與基仔表演魔術的陳法拉都有到場支持，不過基仔指不知她有到來捧場。
基仔又以《星戰》一曲送給所有歌手，他有感而發指出頒獎禮前的是非令歌手大感壓力，他說：「年尾對於歌手嚟講係一種壓力，壓力唔係嚟自頒獎禮，係嚟自之前嘅是非，一陣又話你撐我，一陣又話我寸你，但係真相只有歌手自己知，歌手要戰勝嘅唔係其他歌手，係要戰勝你有幾愛唱歌，我希望所有歌手都得到幸福。」
幽默掀高潮
擔任壓軸嘉賓的林海峰出場時，將音樂會氣氛推至高峯，他說：「個舞台成條告士打道咁長，我真係要三步一跪叩，呢排世貿啲新聞入晒腦，我好想叫DownDownWTO，DownDownWTO！」
林海峰又以「巨峰」命名他與基仔這個組合。對於有傳聞指林海峰將會得到叱咤男歌手銅獎，他笑說：「冇呀，我親口問過新城銳哥我有冇獎，佢話我冇上榜歌，所以冇獎喎！」
採訪：李珮洳
攝影：陳偉權
