大部份弦樂器都採用木做音箱，想喺屋企聽CD都原汁原味，就要套AMP嘅振膜都用埋木，先可以達到最理想嘅共鳴效果。雖然以往要用木嚟製造振膜係非常困難，不過JVC花咗20年研究後，首創咗木製振膜單元揚聲器，突破性嘅技術就係先用日本清酒將樺木浸軟，切割成只有0.28毫米嘅薄木片，製造成振膜之後再用樹脂浸泡以作定型，就成為咗JVCWoodCone系列嘅揚聲器振膜。
提升層次感及空間感
最近JVC推出咗新型號DVD微型音響組合EX-A10，連喇叭振盆同防塵帽都用埋樺木，以提高整體嘅驅動能力，另外喇叭方面亦用咗減少磁性失真及有4層聲圈嘅強磁電路釹磁鐵，令到音質得以提升。JVC更為記者舉行咗一個試聽會，小記親身體驗咗呢部機嘅威力，無論聽小提琴定係鼓，都聽得出好強嘅層次感同空間感，大會更預備咗上一代型號EX-A5畀記者作比較，音質的確有明顯嘅提升，對於追求音響質素嘅用家，不妨去JVC陳列室試聽一下。
記者、攝影：梁瑋瑜
查詢：JVC（27328220）
