今年慶祝80周年校慶嘅英皇書院，活動多多，但就唔怕無人幫手，事關好多官商界高層，都係佢哋嘅畢業舊生，好似噚日佢哋喺校園搞頒獎禮，就搵咗啱啱喺杭州返嚟嘅舊生，恒生柯清輝做主禮嘉賓，柯大班重帶埋着得靚靚嘅太太撐場兼頒獎，兩公婆鬼咁恩愛！
曾經有傳媒話柯大俠做銀行大班係「BankerbyAccident」，皆因佢當年大學畢業，最想做廣告，其次係人事管理，第三先係銀行，最終入咗銀行，重一做就30幾年，咁又點可以話唔意外呢？
唔單止打工係咁，原來佢62年入英皇讀書，都一樣係「byAccident」！事關當年佢由福建來港無耐，乜都唔識，到小學要揀中學，佢見到英皇、皇仁同聖保羅男女，因為英皇個冧巴係1號，咁佢咪填英皇做第一志願囉，結果又派到位喎！
唔好以為入咗英皇就好開心，柯大班話佢小學讀蘇浙，用嘅係普通話教學，而屋企人就講福建話，所以佢頭幾年嘅英文真係麻麻，好辛苦咁先追得上。佢做咗7年英皇仔，年年都望上台攞獎，結果都係得個桔！
之後考咗入港大，柯清輝最有興趣讀心理學，之不過又覺得經濟會易搵工，結果就每樣揀4科讀，佢笑笑口話自己「非龍非馬」，睇怕港大咁多年，都無乜幾個好似佢咁揀科！
柯大班身為師兄，返到母校見到咁多師弟，佢語重心長咁話，雖則港大就喺對面，但「Sonearandyetsofar」，即係咫尺天涯，唔畀心機就入唔到㗎啦！佢重教班師弟，如果想入恒生嘅話，除咗有腦之外，重要面皮夠厚，唔係點sale客搵生意呀！唔知班師弟收唔收到？
李華華