《蘋果日報》十二月十六日訪問一位中國學者韓德強（北京航空航天大學經濟管理學院教授），講及中國加入世貿組織之後，最大問題係經濟自主被「摧毀」及其他等等，不再覆述，以免嘥篇幅。
呢位韓教授不知年紀有幾大，好似唔記得咗中國最高峯、最高度經濟自主時期就係一九四九至一九七六年四人幫垮台之前，一共二十六年，毛澤東高舉馬克思經濟自主紅旗，大叫無外債、無內債，人民當家作主，搞人民公社、大躍進、大鑊飯。結果係點？中國幾百年來最窮困，農民生活最苦嘅時期，就係中共建國嘅頭二十六年。中國好彩有個鄧小平，放棄完全經濟自主，吸收西方嗰套，向西方、世貿靠攏，中國人民先至可以踏入小康社會，人均產值超過一千美元。與中國經濟高度自主時期比較，今日中國人生活好咗還是壞咗？農民生活好咗還是壞咗？
中國農村仍然相對貧困（與城鎮比較），係中國內部制度問題，與貪污腐敗、管理僵化、官僚失職、教育水平低、學校制度敗壞等因素更加有關，唔可以賴世貿。不過在內地，學者鬧世貿，應該冇事，鬧制度、鬧高官，後果會重慘過程翔，啲學者避重就輕，是出位亦出名嘅方法。
韓德強講嘅經濟自主、保護農民言論，在內地已經冇乜市場，唔使多講。一位菲律賓農民打電話去香港電台英文台講外國農產品輸入菲律賓，搞到菲農冇啖好食，佢講日本、美國，甚至新加坡農產品都輸入菲律賓，令佢哋好慘。賓架R以前長駐馬尼拉，聽完菲農訴苦，不禁失笑。賓架R話喺馬尼拉係可以買到唔少外國進口農產品，但價錢好貴，只在高級超市發售，數目有限嘅買家係菲律賓富豪、優皮士、外國商人、外國賓架，與菲律賓大眾完全脫節，根本對菲農產品完全冇威脅，菲律賓本地農產品市場受貪污/黑幫/惡霸操控，與世貿相距十萬八千里，菲農唔講本國內在因素，只鬧世貿係將問題太過簡單化，諉責於外人而已。