哈利佬 - 谷德昭

哈利佬 - 谷德昭

上次寫聖誕檔期大片中寫漏了《哈利波特:火盃的考驗》,因為幾星期前在台灣已看了此片,一時醒唔起原來在香港未上映。
這一集中,哈利仔跟同伴們都已亭亭玉立,處於哈利仔與哈利佬之間,雖然唔係一面青春痘加鵝公喉,但青春期中的年輕人的長相確是暗藏幾分尷尬,Cute又唔係好Cute,Man又唔係Man。上集中非常搶鏡的貌似許冠英的紅髮同學,在今集中起不到喜劇效果,不靚仔的小朋友我們可稱之為得意,但不靚仔的年輕人就是不靚仔的年輕人,冇第二條路。
第一集當然最卜卜脆,每個細節都充滿幻想力,小如食粒魔法糖果豆都描寫得趣味盎然,但這類小情小趣看了幾集,有點看「鈍」了。最新一集的劇情講述哈利受到召喚,越級挑戰魔法測試,爭奪聖盃,另一方面,魔王佛地魔亦照例設下陷阱,新意不大。華籍少女KatieLeung飾演張秋,在這集中其實戲份不多,不過小外甥是哈利迷,她說張秋將會很重要,因為會成為哈利的初吻對象。找來《四個婚禮一個葬禮》的導演MikeNewell執導,總覺有點格格不入,成人有餘,童心不足。
此集的故事缺乏一個重點突破,亦沒有全新震撼的視覺特技設計,不過反正哈利的書迷及戲迷都已看了頭幾集,正所謂目標觀點喺晒度,票房一定冇問題,好過印銀紙。