世貿曲終人散，經過一百個鐘頭馬拉松談判，通過四十一頁香港宣言，比起上次坎昆會議，算係大有躍進。鬍鬚曾曾俊華作為大會主席兼東道主，應該瞓得着。
八方聽講，鬍鬚曾前晚搞到成點鐘，送走晒班部長，順利交番個場畀會展，只係瞓咗一陣，噚日朝晨咁早又返咗工，重鬼打咁精神㖭。
本來做工商及科技局局長，在政府高層中唔算當風位置，最多係要成日飛來飛去；呢幾年啲電訊公司喜打官司，但有區文浩擋一擋，餘下來最煩可能就係港台。勢估唔到，唐英年接咗世貿呢壇嘢嚟搞，然後自己就升咗官去做財爺，鬍鬚曾呢個局長，呢一年嘅工作量，可能等於其他局長做三四年。
煲呔用人：忠誠第一
不過，勤勞係有回報嘅。搞完世貿，鬍鬚曾大有機會再上層樓，佢係煲呔愛將，忠誠上冇問題。講起忠誠，聽講現時煲呔用人嘅標準，才幹其次，忠誠第一，你唔係我嫡系都幾難上位，呢個變化唔知同董生嘅經歷有冇關係呢？
講番曾俊華，早前有消息話佢會去做黃公公個位。在中國官場，辦公室主任係好重要嘅位，香港中國化，呢個位亦不能落入外人之手，鬍鬚曾一定信得過，可惜係D8要降一級，而○七年煲呔再當選，肥龍告老歸田，政務司司長間維多利亞大宅，都要搵人住。
邊個啱呢？曾俊華就係其中一個人選，佢勝在忠誠，無黨無派，無商界利益，形象亦好。不過，最近有風吹出嚟話，唐英年都得到朝中人士支持，有意思去爭。事關做一任政務司，二○一二年煲呔落台，要競逐特首個位就好着數，所以大家睇近日唐少爺已經生番晒。至於李國章，佢當然亦好有心為人民服務，問題係大家都有啲擔心，擔心冇人控制到佢呢位大少。
咁曾俊華亦唔係冇弱點，其中一個就係資歷較淺，其他局長條氣唔順。總之，曾唐李呢三隻馬都有得跑；而特區官場走馬燈咁，久不久又有個陳太出嚟客串，一定好戲連場。
傳真︰2623-9278
電郵︰[email protected]